أنت عايش ليه؟!
سؤال غريب وسألناه لنفسنا كتير وفي لحظات غريبة...هل إتخلقت علشان أدرس وأكبر وأشتغل وأتجوز وأخلف عيال وأربيهم ....وأمشي على نهج كل الناس وخلاص؟
هل ربنا خلقنا علشان نعبده زي ما المتدينين بيقولوا؟ ما لو خلقنا لنعبد الله بالمعنى الحرفي أكيد ربنا ماكانش خلقنا أصلاً....ما الملائكة بيعبدوه أحسن مننا وماعندهمش حتى فكرة المعصية ولا الإختيار.
ربنا خلق حسب الحديث القدسي ليكتشف قدرته «كنت كنزاً مخفياً فأحببت أن أُعرف فخلقت الخلق وعرفتهم بي فبي عرفوني».
بس بعد ما اكتشف قدرته خلق من يعبدونه أحسن مننا "الملائكة" لكن خلقنا إحنا ليه؟ وليه خلقنا كتير كدة ؟ ومختلفين كدة؟ وليه مننا عمرة طويل وغيره عمره قصير؟
هأتكلم عن قناعتي الشخصية..
ربنا خلقنا لأسباب مختلفة ...في مننا بيتخلق عـِبّرة للي حواليه "زي الطغاة وقت سقوطهم" وفي مننا بيتخلق هدية للي حواليه "وزيهم كتير ..منهم أمهات وأولاد وشيوخ وقساوسة" الناس دي بموتها أو غيابهم بنحس إنهم كانوا أشباه ملائكة على الأرض وأحياناً بنستخسر وجودهم وسطنا.
طيب واللي لا عبرة ولا هدية ....زي كتير مننا كدة دول بيتخلقوا ليه؟
ربنا خلق كل واحد فينا لسبب ...كبير أو صغير ماحدش بيعرفه ...أنا ممكن يكون ربنا خلقني لأسباب كتيرة وفي كل موقف بأكتشف سبب منهم...ممكن أكون سبب لطاقة إيجابية وسط ناس متشائمين...ممكن أكون سبب سعادة حد في موقف ما ساعدته فيه...ممكن أكون ...وأكون ...وأكون...
مش مهم أعرف السبب ده دلوقتي ...المهم أكون عارفة إنه في سبب لأني ما اتخلقتش بالصدفة...وما أتخلقتش علشان أمشي على كتالوج حياة "دراسة ، شغل، جواز، وخلفة"
ده كتالوج واحد حطه لنفسه زمان وقال عليه كتالوج الحياة وغيره أخدوه كدة زي ماهو من غير أي تعديل وإفتكروه الكتالوج الحياتي الوحيد.
طيب ليه مش كل واحد يحط كتالوج حياته لنفسه...أنا الشغل بيبسطني يبقى هأديله أولوية، ومش عايزة أتجوز وخلاص يبقى مش هيفرق معايا كلام الناس ولا هأتجوز الإ لو لقيت اللي أحب أشارك حياته وأشركه في حياتي.
كل واحد له حياة واحدة بس ما يعرفش هتطول ولا تقصر؟ ...اللي فات منه أكبر ولا اللي لسه فاضل له أكتر؟ يبقى عيشها زي ما يعجبك.
المهم إنك ما اتخلقتش صدفة ولا على سبيل العدد في اللمون...أنت أنت ...أنت مش حد تاني ولا التاني ده أنت ...عيش وأعبد وهييس واتجنن واعمل اللي يسعدك ...يسعدك أنت وبس...مادام مش هتضر حد تاني يبقى خلاص.
هات ورقة وقلم واكتب كتالوج حياتك...ضيف وعدل وغير اللي يعجبك فيه.
