الثلاثاء، 8 نوفمبر 2011

حــيــاة الــكـــلام



عمرك سألت نفسك الكلام اللي بتتكلمه أو بتسمعه جاي منين ...وبيروح فين بعد كده "آه ماهو بيروح مكان تاني ويرجع لك-هأقولك بس كمل قراية للآخر"

علمياً الكلام بيطلع من المخ وأنت في وسط حوار تلاقي مثلاَ  كلب معدي قدامك "كلب" الكلمة دي بتطلع من وسط أسامي حيوانات كتير في مخك إزاي - المسئول عن إختيار كلمة محددة لشئ معبن هو "LIFG" دي منطقة في المخ وظيفتها إختيار الكلمات اللي بنقولها، و منطقة   "LIFG" تشمل جزئية يطلق عليها اسم "بروكا"، على اسم العالم الفرنسي الشهير خلال القرن التاسع عشر "بول بييرا بروكا". وهي الجزئية المسؤولة عن جوانب إنتاج الحديث، وتجهيز وفهم اللغة.

سيبك من الكلام العلمي ده...أنا شايفة إن الكلام نوعين :

-         نوع بيطلع من مخك بشكل روتيني وبعد ما بتقوله ممكن تنساه لأنك مش بتنكون مرّكز في اللي طالع من لسانك "مجرد إشارة من المخ بتطلع في صيغة كلام على لسانك"..زي لما حد يقولك "صباح الخير" فتلقائياً بترد "صباح النور".


-         النوع التاني "آااه من النوع التاني" كلام طالع من القلب....يعني بتركز في كل كلمة بتقولها وبتقولها لمين وبتقولها له إمتى..بترّكز في معنى كل كلمة عايز توّصلها للمتلقي اللي قدامك ....وعادة من كـُتر المجهود اللي بتبذلة في كلام القلب مش بتنساه...بيفضل محفور في ذاكرتك مهما مرت السنين.

والكلام بكل أنواعه لما بيخرج من جواك "لحظة ميلاده" بيدأ مرحلة جديدة يعني بيخرج من بـُقك ويسبح في الكون ويلف دورة "طويلة أو قصيرة" وبيرجع لك مرة تانية بس كمتلقي مش مـُتكلم.
أقولك إزاي...مثلاً حد من صحابك إترقى أو إتجوز أو راح عُمرة...بتروح تبارك له وتهنيه وتقوله "ألف مبروك" ممكن تقولها  من مخك بس من جواك حاقد وبتقول اشمعنى هو...أو تطلع "ألف مبروك"  من قلبك وأنت بتتمنى له السعادة حتى لو بتتمنى لنفسك تكون مكانه بس مش حاقد عليه.

"ألف مبروك" طلعت منك – لحظة ميلادها- وتبدأ تسبح في الكون وتلف وتدور وعند أول مناسبة ليك ...تترقى، تتجوز، تسافر، أي حاجة ...تلاقي حد جاي يقولك "ألف مبروك"...حد بيقولها لك بحقد – نفس الحقد اللي كان جواك قبل كدة -  وحد تاني بيقولها لك من قلبه وبيتمنى لك الخير – وهو نفس اللي كنت بتتمنى له الخير.

في مثل بيقولك " كلمة هـَوّ ما بتروحش في الجـَوّ" كل اللي بتقوله راجع لك تاني

"الكلمة" لفظ من 6 حروف بس كلها حياة  ولو عايز تعرف أكتر شوف اللينك ده:http://www.yabeyrouth.com/pages/index3016.htm



مقولة "الكلمة نــور...وبعض الكلمات قبور" حقيقية

                              خلى كل كلامك نور ليك قبل اللي حواليك