الثلاثاء، 13 ديسمبر 2011

حكايات محمد محمود

تويتات بيكو @BikoB عن محمد محمود


أول يوم نزلنا محمد محمود كانوا لسه بيضربوا في الميدان نفسه، وكانوا بيفرقونا في شوارع طلعت حرب والألفي وعند المتحف وكانوا بيطوقوا الميدان كله


فضلنا بنكسر في رصيف طلعت حرب ونحدف طوب وهما يرده بغاز وكمشات في شوارع الجانبية من طلعت حرب وكنا مشتتاتين فشخ كل حبه في حته شكل وبنجمع بعض


فضل الوضع كده لحد لما الالتراس نزل، أول لما نزلم، الميدان اتفتح والشرطة انسحبت لمحمد محمود والقصر العيني والناس فضلت تحدف طوب وساعتها بقي.


دخلنا محمد محمود كلنا وكان طحن بطريقة بشعة، محدش كان معاه ماسك لا حتي كان عامل حسابه في حاجة، البيبسي كان في ازايز نص لتر و200مل وقليل فشخ.


ناس كتير قوي وقعت اليوم ده، ومحدش كان عارف يتصرف وكل همنا انهم ميدخلوش الميدان وأي حد كان بيقع كان أي 4 بيشلوه وبدأت المستشفي الميداني تشتغل.


يومها أنا مش هنسي أني دخلت مع أرجل ناس في الدنيا، هيشوز، صبرولجي، عادل صليب، خالد. اللي كانوا موجودين من بدري وأضربوا خراطيش من الأول.


كنا بندخل ماسكين أيد بعض جامد ومحدش بيجري مننا وبندخل نحاول نحدف طوب ونطلع لما الغاز يفشخنا جامد، كنا بنحس أننا هيغم علينا من الغاز.



كنا بنحمي بعض من غير ما نحس لما بنسمع صوت الخرطوش بندور ونلم بعض كده ومحدش كان بيسيب أيد التاني عشان محدش يوقع مننا.

يومها بدأت الناس تنزل اكتر وفضلنا زانقنهم في محمد محمود والإعداد كانت بتزيد بس مكناش بنحس لأن الناس اللي بتقع مننا كتير جدا بقينا نروح ونرجع.

بدأنا نتقابل هناك وندخل من مكان معين ولو توهنا نتجمع في مكان معين متفقين عليه، مكناش بنحس بالخراطيش من كتر ماحنا متحمسين وبنحذف طوب بغل فشخ.

يوم لما خرم اتضرب على دماغة وخدوه على المستشفي أول لما عرفنا رحنا كنا هيشوز وحزلقوم وأنا وعادل وفتحي عبد الوهاب وصلوا قبلنا وخدناه يعمل أشعة.

بعد كده رحنا بيه كذا مستشفي بس عشان منعملش زحمة بني عادل وفتحي وصبرولجي مع خرم وهيشوز وحزلقوم وأنا قعدنا بنريح في عربية هيشوز شوية هناك.

كنا محدش بيكلم التاني، قاعدين زعلانين علي خرم ومحدش كان طايق يتنفس وتعب الدنيا كلها وشبه هنعيط من اللي بيحصل للناس وخرم جاله شرخ في الجمجمة.

سبنا هيشوز لاقيته بيكلمني في رجعت اشوف في ايه، بصلي وبصوت يخلي الحيوان يعيط، قالي: "بيكو، روح لو سمحت أنا مش مستحمل حد من أصحابي يحصله حاجه"

لو قعدت أقولكم قد ايه أنا كنت هعيط من الجملة دي بس لاقتني بقوله حاضر، وفعلا روحت عشان مكنتش مستحمل أسمع أي حد يحصله حاجة بجد كان وقت صعب قوي

اكتشفت في ال 6 أيام دول حاجات عمري معرفتها قبل كده في الناس، زي هيشيوز عمري ما كنت عارف انه حنين كده وطيب طيبه غير طبيعية بجد انسان وهمي بجد.

اكتشفت ان صبرولوجي راجل فشخ ومبيسبناش غير لما نكون كلنا كويسين وقد ايه كان خايف علينا، واكتشفت ان أميرة نصير بميت مليون بنت لأنها كانت معانا  واكتشفت ان عادل صليب جسمه مش ضعيف زي ماهوا باين عليه، ده استحمل زيي زيه كده مع فرق الحجم، واكتشفت قد ايه هوا شجاع بس مستني حد يشجعه

اكتشفت ان خالد أرجل من ما كنت عارف، رغم ان عينيه غلط عليها الغاز بس دخل معانا وطلع قدام في الأول كمان، واكتشفت ان حزلقوم حب المغامرة معانا و اكتشفت ان حازم صادق راجل فشخ ومش هنسي انه أداني الجاكيت بتاعه والجاكيت ده شال من علي ظهري خرطوش بالعبيط ومخلاش البلي يدخل في ظهري.

اكتشفت بنات كتير نزلوا وأنت لو شفتهم في الحقيقة هتقول دول سيس وبتوع بابي ومامي بس كانوا أجدع مننا... كل واحد كان بيقوم بدوره واللي يقدر عليه.

رباب كانت من الناس اللي بجد أنا كنت بحبهم قبل محمد محمود بس بعد محمد محمود أنا ممكن أديهم عيني لو طلبوها، رباب كان جدعة بزيادة وبتلم تبرعات..أنا اللي حاسيته أني كنت وسط عائلة صغيرة مكونة من الناس دي، كنت ببقي نفسي أخد أنا الضرب بدلهم لو كنت أقدر عشان الناس دي تتحب من القلب للقلب.
مش عايز أنسي أسامي عشان محدش يزعل مني بس كله كان رجاله، ماركو، ششتاوي، نور العقاد، سارتي، محمد عبدالحميد، ماسوني، سما سينجر، تقي، شيرين، ندي.

معرفش الناس ممكن تكون شايفه كل ده كلام بس اللي نزل هيحس بيه قوي، عشان كده أنا بحب أصحابي على التويتر وبحبهم في الحقيقة كمان، ربنا يخليكم ليا.

أنا معملتش حاجة في محمد محمود زي ما كل الناس عملت، كلنا كنا واحد 

واكتر موقف مش هنساه "عند مكتبه الجامعة الأمريكية وطفينا نور الشارع عشان نضربهم من غير لما يشوفوا فا المدرعة نورت النور بتاعها كلنا هتفنا "الجيش والشرطة أيد وسخة"