الثلاثاء، 5 يونيو 2012

كان نفسي


أكون نقطة مية بتتنطط بين ورق الشجر ولما تزهق تقعد في الشمس وتتبخر وتختفي

الحياة تكون أبسط من كدة

أكون ريشة وزني مالوش وزن وأطير من غير حزن

الهم يكون بسمة وأكبر هم يكون ضحكة

الناس ما تعرفش الحقد ويعرفوا أنها مش دايمة لحد

نزرع شجر الفرحة في بيتنا وتكون طول السنة طرحة ونقطف ثمرتها 

كل واحد يكون في حالة والدنيا أكيد هتحلى له

الضمير يكون له صوت علشان أسمع صوته في الشارع وهو بيكلم أصحابه



العيون بتشوف النفوس وكل نفس يكون لها لون....وكل 
واحد يشوف نفسه

أكون عصفورة جناحاتها بالسما مبهورة وسايبة الأرض على طول مهجورة

أن البني آدم يعرف أن كلامه وأفعاله ممكن تأذي غيره ....وأنه بيهم بيشتري عداوه غيره

في زرار أقفل بيه عقلي وقت ما يتعبني

ما أجذبش الأشخاص الغلط لحياتي....هو واحد بس لو ماجاش مش هأنتهي ولا هيكون فيه مماتي

حدودي تكون ظاهرة وما أضطرش أظهرها بكلام علشان محدش يتخطاها

الناس يكون فيها عدم الكراهية بيلت إن.....الكراهية إنتهاء صلاحية الإنسانية

السعادة تكون تحت الأمر مش بعد المُر

أعيش مش أتلهي في أمور العيش

أقدر أغير زماني ومكاني وقت ما يصفى لي

كلنا نفس الإنسان ....من جواه نفسه يكون ونسان

أدي كتاب لنفسي وكتاب لروحي .....يمكن يكتبوا و يعرفوني حدود طموحي

الناس ما تأخدش موقف من غيرهم محاباه لحد تالت....اتعامل حسب تجاربك الشخصية مش حسب طرف فالت

الناس تفهم أن الصراحة بوح وراحة ...مش نوح وعداوة

اللي يجلب الهم نلغيه من الحياة ونصحى تاني يوم نسيناه

الناس تكون راضية ويعرفوا أن فركهم ما هيفرق وهيقضي عليهم بالقاضية

 ‏  أقابل اللي يجلب لي السعادة مش يأخدها مني 


هناك 5 تعليقات:

  1. كان نفسى الناس يبقى عندهامبدا تمشى عليه حتى لو ضد التيار بس المهم تبقى صادقة مع نفسها والنفسية مرتاحة

    ردحذف
  2. ليس كل ما يتمناه المرء يدركه .. بس برضه لو بطلنا نحلم نموت .. شوية أمل و كله هيبقى تمام

    ردحذف
  3. الله عليك يا رباب
    كان نفسى لخصتك كل الحكاية
    الغريب إننا كلنا نفسنا!! طيب ليه مفيش إنعكاس من اللى كان نفسنا فيه فى حياتنا؟!

    ردحذف