الأحد، 19 فبراير، 2012

شريك العمر...لأ، شريك الدنيا والآخرة




 هأختار شريك الحياة والآخرة إزاي؟

شريك العمر مش شراكة على ورق...ده شريك دنيا وآخرة ..ومش عايزة أخد ذنوب على إختيار غلط وأشيل ذنب أولاد جم لدنيا بسببي وبسبب إختياري الغلط

جملة "الجواز زي البطيخ" بتضايقني ...إحنا مش فكهانية أومال اللي فوق كتافك ده ايه؟! قرع عسلي مش مخ؟!...دايماً بتكون في علامات بتبين كل العيوب في فترة التعارف بس إحنا بنتجاهلها تحت بند "مراية الحب عامية"لأ دي مفتحة وإحنا اللي بنملاها شبورة علشان ما نشوفش بمزاجنا.

محدش يقولك لما أنا إخترت أو "بسخرية" أنت بتحلم تلاقي نصك؟ ابقى قابلني! طب ده أنا قرفان وزهقان والجواز قرف...

حاجة غريبة إن كلهم بيقولوا الوحش بس وماحدش بيفتكر يقول كلمة حلوة في شريك حياته...يا إما عنده الزهايمر ونسي اللحظات الحلوة يا إما خايف من الحسد "دول كتير وخصوصاً السيدات" أو هو فعلاً عايش حياة صعبة "آسفة" وغبي وراضي بيها ويدمر الباقي من عمره"

حياتنا مش كتالوج بيتوزع علينا ولازم كلنا نمشي على نفس الكتالوج...اكتب كتالوج حياتك وماتشترهوش جاهز...عمرك وحياتك وكتالوجك أنت... أنت.‏


طيب لو مش لاقي نصي؟

لو مالقتش نصك هتعرف تكون واحد صحيح لوحدك...مش لازم كلنا نكون نصين ولا كلنا نكون واحد صحيح...الحياة مش كوبي وبيست ..الحياة حيوات كتير بألوان وأحجام مختلفة...ارسم حياتك ولونها بألوانك وكبرها أو صغرها على مزاجك.


لو مالقتش نصك أوعى ترضى بأي نص... حياتك مش صورة يحب غيرك يشوفها وأنت بتركب لها البرواز...حياتك حكاية أنت تحب تكون جواها..أَحسن اختيار حكايتك.  ‎


لو اخترت حكايتك وفشلت أو أنت مش راضي عنها أرجوك ماتحكيهاش لغيرك...ماتحبطش حد لسه بيرسم غلاف حكايته سيبه يحلم زي ماكان لك الحق تحلم ... أو احكي الحلو زي ما بتحكي الوحش ولا أنت عندك الزهايمر؟!

أنا هأختار إزاي؟


لو لقيت اللي يموت معايا مستعدة أعيش معاه 



هناك 5 تعليقات:

  1. مولود فى لحظة عشق لو اكتملت ولدت بدون نقص فلومى لكما كبير

    ردحذف
  2. طيب لو لقيتي الي بيحبك و شاريكي بس انتي مش حاسة ناحيتو بنفس الشعور ده مع انو عقلك بيقولك انو انسان هايل و ميتعوضش تعملي ايه ؟

    ردحذف
    الردود
    1. إزاي هأحس إنه هو ومش هو؟ ده تناقض :)

      حذف
    2. مش شايف تناقض قد ما شايف حيرة لسبب ما. يمكن مش موجود ! ويمكن ده لخوف من مجهول أو الخوف من بكرة مثلا

      حذف