الجمعة، 9 مارس 2012

العربية قتلت صحابي! اخص ع العربية!!





أنا وتلاتة من صحابي قررنا نمشي في شارع وكان في راجل كبير بيضايقنا بيمشي فيه ....قررت أن وصحابي نقف قدامه ونواجهه بغض لنظر عن النتيجة؛ بس  المواجهة أدت لأن واحد من صحابنا مات والتاني أتصاب والتالت كدمات وأنا سليم الحمد لله.

والراجل اللي بيضايقنا ماجرالوش حاجة!

قررت أروح أنا وصحابي الاتنين نروح نواجهه في الشارع تاني وزي المرة اللي فاتت بالظبط....واحد فينا مات والتاني أتصاب وأنا كدمات.

والراجل اللي بيضايقنا ماجرالوش حاجة!

بعد ما وقفنا على رجلينا أنا وصاحبي اللي فاضل قررنا نروح نواجه الراجل في عربيته تاني وفي الشارع ونقف قصاد عربيته....وصاحبي اللي فاضل لي مات!!!

والراجل اللي بيضايقنا ماجرالوش حاجة!

بقيت لوحدي ومش فاكر هو إحنا كنا ببنزل الشارع ليه؟!  ولا اسم صاحبي الأولاني اللي مات كان إيه؟

 وليه ماجربناش طريقة تانية؟  

ليه الراجل ده كل مرة بيكمل ويوصل لطريقه وإحن ما وصلناش لحاجة؟!

ليه مغيرناش من طريقتنا؟

 ليه مركبناش العربية معاه يمكن كنا خدناه لطريقنا....ولو معرفناش نركب معاه كنا اتشعبطتنا ورا ونتحمل العادم لحد ما نوصل؟!!

هو إحنا كنا أغبياء ولا كنا عنديين....لأيه خدنا الشارع وسيلة دايمة لحد ما أتحول لهدف؟!
 ليه مافكرناش في وسائل تانية؟!

ليه ما ركبنش العربية وخليناه يسوق على مزاجنا؟!
ليه مالعبناهوش لحد ما نأخد حقنا؟!

هذة هى ثورتنا يا سادة والعربية ماشية ومكملة وإحنا لسه في الشارع!!!

إتخذنا الشارع وسيلة وحيدة ولم نُعدد وسائلنا....استخدام وسيلة واحدة لأكثر من سنة حولها لهدف ...لم تعد بنفس بريقها بل أصبحت تسحب من رصيد مستخدميها...عليكم بالتطوير والتجديد والسعى في أكثر من إتجاه.

هناك 5 تعليقات:

  1. والله العظيم ده فعلا راى ليه مانسبش الوساخة لولاد الوسخة وندور لنفسنا على حاجة نظيفة نعملها المسيرات دى بقت فخ والغريبة ان كل مرة بناكلها ونرجع نسال مين اللى اكل الجبنة ؟

    ردحذف
  2. طول عمر فلسطين بتواجه الرصاص بالطوب لا الرصاص سكت ولا الطوب هو دا اللي في ايدينا هو دا قدرنا

    ردحذف
  3. يا اللى نصحت الناس بشرب النبيت
    مع بنت حلوة وعود وضحك وحديت
    مش كنت تنصحهم منين يكسبوا
    تمن ده كله ؟..و لا يمكن نسيت
    عجبى ؟؟؟

    معاكى فى ده تماما تفرغوا للثورة امام الكيبورد او فى مسيرات و نسوا ان سبب نجاح الثورة احساس الناس بهم و التفافهم حولها
    راجعى كل المكاسب التى حدثت بعد الثورة حدثت عندما التف الناس حول الثورة
    اعجبنى حملة كاذبون و سلاسل الحرية و اتمنى لو بدات مبكرا
    يجب ان يترك الكيبورد و النزول للناس و الجلوس معهم على الارض
    تحياتى و تقديرى

    ردحذف
  4. وهو لازم نركب معاه العربية ..ليه مانفجرش العربية ونخلص ونعمل عربية جديدة على مزاجنا

    ردحذف